tungkol sa graduation

nakakasilaw ang entablado. pilit na sumisilip ang papalubog nang araw. para bang ayaw palampasin ang mahalagang pangyayaring ito.

tulad ko. napakarami kong plano. para sana sa iyo. pero hindi ko maisakatuparan.

tinatanaw kita mula sa malayo. tanaw pa kita, pero malayo ka na. halos hindi ko na mawatasan ang iyong anyo. hindi na malinaw ang iyong dibuho sa gitna ng karamihang ito. hindi ka na lumulutang sa gitna ng karagatang ito ng puting blusa at sablay.

waring nalingat lang ako. ang huli ko kasing pagkakaalala ay abot tanaw pa kita. abot kamay pa nga yata. sa bilis ng oras, ang mga sandaling iyon ng pagsasama natin ay isang malayong nagdaan na pala. hindi ako nakapaghanda.

lalo ka nang naglaho sa dilim ng gabi. ang mga ilaw ng bulwagang quezon ay hindi naging sapat upang ipaaninag ka.

dumagdag pa ang malamig na ihip ng hangin sa drama ng pag-iisa.

at hayun, minamasdan kita, palayo nang palayo, paliit ng paliit sa paningin.

hanggang sa tuluyan ka na kitang di makita. tuluyan na kitang hindi madama.

kahit katabi lang kita.

ibinulong ko na lang sa hangin ang isang malungkot na paalam. kung kailan ito maihahatid sa iyo ay panahon lang ang nakakaalam.